- Ane Oyarbide, Ekonomia eta Tokiko Enpleguko zinegotzia: “EKINNera datorren ekintzailearen profila gazteria, kualifikazioa eta berrikuntzaren aldeko apustuagatik bereizten da, datu bereziki garrantzitsu batekin: emakumeen ekintzailetzaren hazkunde jarraitua”.
- Gunea Donostia Sustapenaren estrategiako funtsezko pieza bihurtu da hiriko ekintzailetza eta berrikuntza bultzatzeko.
EKINNek, Donostia Sustapenak kudeatzen duen Donostiako Berrikuntza eta Ekintzailetza Nodoak, bi urte bete ditu ireki zenetik, eta, denbora horretan, hiriko kultura ekintzailea bultzatzeko, proiektu berritzaileak azeleratzeko eta tokiko ekosistemaren konexioak errazteko erreferentziako gune bihurtu da. Ireki zenetik 11.000 pertsona igaro dira EKINNetik, herritarren eta talentu ekintzailearen topagunea finkatuz.
EKINNen arreta jaso duten pertsona ekintzailearen profilak adierazten du % 45ak 35 urte baino gutxiago dituela, % 51,1ak emakumeak, eta % 47 inguruk unibertsitate ikasketak dituzte esaten digu, lanbide heziketaren pisu nabarmenarekin batera. Horrez gain, arreta jaso dutenen % 28 etorkinak izan dira. Ekipamendu hurbil eta ireki honen izaera seinale.
Ekonomia eta Tokiko Enpleguko zinegotzi Ane Oyarbidek nabarmendu duenez, “lehen bi urte hauetako datuek berresten dute EKINN espazio bizia, irekia eta erabilgarria dela hiriarentzat. 10.000 pertsona baino gehiago igaro dira dagoeneko nodo honetatik. Nodoak zerbitzuak, programak eta baliabideak biltzen ditu, ekintzaileei proiektuaren fase guztietan laguntzeko, eta, aldi berean, kultura ekintzailea sustatzen du eta talentua erakartzen eta garatzen laguntzen du. Oyarbidek, gainera, “emakumeen ekintzailetzak epe horretan izan duen hazkunde iraunkorra” nabarmendu du. Datuek islatzen dute gero eta emakume gehiagok ematen dutela ekiteko eta beren proiektuak finkatzeko urratsa, eta horrek erakusten du bultzatzen ari garen berdintasun-politikek benetako aukerak sortzen dituztela eta hiriarentzat ekosistema ekonomiko anitzagoa, inklusiboagoa eta lehiakorragoa eraikitzen laguntzen dutela”.
Kultura ekintzailea: biharko talentua gaur ereitea
Ireki zenetik, ekintzaileari arreta emateko bulegoak 1500 bisita baino gehiagotan partekatu ditu Donostia Sustapenaren ekintzailetza programa eta zerbitzuak.
Kultura ekintzailea bultzatzea da EKINNen ardatz nagusietako bat. Bi urte hauetan, guneak 52 saio trinko antolatu ditu ekintzailetzarekin eta berrikuntzarekin lotutako sentsibilizazioa, prestakuntza eta gaitasunen garapena bultzatzeko, eta hainbat ikastetxe, unibertsitate eta lanbide heziketako zentroetako gazte eta ikasleen parte hartze nabarmena lortu du, besteak beste, EHU, Tecnun, Tknika, Cebanc, Ceinpro, Elizaran, Easo Politeknikoa eta Nazaret etorritakoak.
Lehen bi jarduera urteetan, San Bartolome Gaina kalean kokatuta dagoen gunera jende asko etorri izana ekintzailetzarekin eta berrikuntzarekin lotutako zerbitzu, programa, prestakuntza eta orientazio jarduera eta ekitaldietan parte hartzearen emaitza izan da. Berez, 3.033 pertsonari eman zaie zuzeneko arreta kultura ekintzailearen inguruko sentsibilizazio ekintzetan, horietatik erdia inguru (1.289) ikasleak izan direlarik; beraz, argi gelditu da EKINNek sentsibilizazio goiztiarraren eta bokazio ekintzaileak sortzearen alde egin duen apustu irmoa.
Ekintzailetza tradizional zein berritzailerako herritarren esku jarri diren tresna eta zerbitzuek askotariko profilen interes ekintzailea piztu dute, eta hiriko erronka ekonomiko eta sozialekin lerrokatuta dauden bokazio ekintzaileak sustatu dituzte ere, adibidez, Donostia Innovation Challenge edo Berrikuntzaren Asteko ekintzen bidez.
Proiektuen azelerazioa eta hazkundea: EKINN+, programa eragilea
Proiektuen azelerazioaren esparruan, EKINNek 450 proiektu ekintzaile baino gehiagori lagundu die bi urte hauetan, horietako % 60 izaera berritzailekoak. Guztira, EKINNek 2.000 ekintzaileen bisita baino gehiago jaso ditu. Zerbitzu eta programa guztiak tokiko proiektuen eskura daude, eta arreta berezia jartzen zaie eremu estrategikoei, hala nola ezagutza-zerbitzu aurreratuei edo bioteknologiari, ahaztu gabe hiri-ekonomiaren esparruko ekimenak, hala nola zerbitzu pertsonalak, merkataritza, ostalaritza edo gastronomia, ibilbide eta programa espezifikoak baitituzte.
Urteurrenarekin bat etorriz, EKINNek Donostia Sustapenaren proiektu berritzaileak azeleratzeko EKINN+ programaren edizio berri bat abian jarri du, 200 startup baino gehiagok osatutako hiriko Komunitate Ekintzailearen funtsezko oinarrietako bat dena.
Programak 20 proiektu inguru hautatzen ditu dozenaka hautagairen artean, eta duela gutxi Enpresa Sustapenaren Europako Sarietan (EEPA) aitorpena jaso du, nazioartean duen proiekzioa eta ekintzailetza berritzailea bultzatzeko tresna gisa duen balioa indartuz. Programa 2014an sortu zen, eta, 2017an nabarmen indartu ondoren, izaera berritzaileko tokiko 166 enpresa-ekimen babestu ditu.
Nabarmentzekoa da akordio egituratzaileak dituzten eta programa sustatzeko aukera ematen duten erakundeekin izandako lankidetza, finkatutako tresnak artikulatuz, hala nola Elkargirekin eta Abalen Funtsa programarekin. Aurten, funtsak 6 eragiketa gauzatu ditu, ia milioi bat euroko finantzaketarekin, eta Donostiako Sustapenak hartu du bere gain arriskuaren zati bat.
Plataforma eta konexioa
Tokiko nahiz nazioarteko berrikuntza eta ekintzailetza ekosistemako erakunde estrategikoekiko lankidetza eta lotura indartzea funtsezkoa izan da topagune honen izaera irekia are gehiago azpimarratzeko. Bi urte hauetan, 4.000 pertsonak baino gehiagok parte hartu dute ekitaldietan eta topaketetan, besteak beste, erakunde hauek antolatutakoak: Adegiko Ekintzaileen Foroa, Tecnalia Ventures, Gipuzkoa Ganbara, Berri Up, Aspegi, EIWA, Tknika, The Cube, Retina, Young Leaders, Invest in Basque Country, Enisa edo Woman Startup Community.
Bere kudeaketa-eredua ezagutu nahi duten nazioarteko ordezkaritzen bisitak ere jaso ditu, hala nola Malaga, Leon, Lisboa, Bolonia edo Finlandiako Espoorenak, edo tokiko zenbait erakunderenak, hala nola Garapen edo Eudel, estatukoak (COTEC) eta nazioartekoak, hala nola Eurocities sarekoak. Horiekin, etorkizuneko lankidetzak garatzen ari dira berrikuntzaren eta ekintzailetzaren arloan. Izan ere, EKINNek, bere erabilera anitzei esker, prestakuntzaren erronkari, aukeren garapenari, proiektu profesionalei eta etxebizitzaren erronkari heltzeko aukera ematen du.
Talentuari harrera egin eta talentua erakartzea
Ekipamendu horri proiektuaren bizitegi dimentsioa gehitzen zaio: eraikineko 70 apartamentuek Talent House Harrera Plana osatzen dute, beste 80 apartamenturekin batera, eta talentu ekintzailea erakartzeko eta fidelizatzeko aukera ematen dute, bai tokikoa, bai nazioartekoa.
Aurten, EKINNekin hiriko talentu gaztearen aldeko apustua indartu da, bi pertsona sartu baitira Donostiako gazteentzako EKINN egoitza programan. Donostiako gazteei ostatu aukerak eskaintzera bideratutako ekimena da, hiriko ekintzailetza eta berrikuntza proiektuei lotuta dagoen beren garapen profesionaleko funtsezko etapa batean.
Era berean, aurten, tokiko talentu gaztearen aldeko apustuaren ildotik, lehen aldiz, hiru proiekturi lagundu zaie, gizarte eragina duten gazteen proiektu berritzaileei zuzendutako laguntzen bidez. Laguntza horiek 35 urtetik beherakoentzat dira, baldin eta proposamen berritzaileen bidez hirian edo komunitatean gizarte eragin positiboa sortzen badute.
Donostia Sustapeneko zuzendari gerente Iñigo Olaizolaren iritziz, “EKINN funtsezko pieza da berrikuntza eta ekintzailetza bultzatzeko gure estrategian. Ekipamendu-eredu berri bat da, erabilera mistokoa (ostatua, lan-espazioak, prestakuntza, aholkularitza-zerbitzuak, ekitaldiak eta konexio-espazioak), pertsonak, proiektuak eta gure hiriko eragileen ekosistema bera konektatzeko aukera ematen diguna. Esku-hartzeko eredu horrek aukera ematen digu, hiri- ingurunetik, tokiko eta nazioarteko talentuarentzat aukerak sortzeko, kasu honetan ekintzailetasunari dagokionez. Gune irekia da, lankidetzaren bidez ekintzailetza bultzatzeko politika garatzeko edukiontzia”.
Bigarren urteurren honekin, EKINNek bere eginkizuna sendotzen jarraituko du, batetik, Donostia Sustapenaren proiektu estrategiko gisa eta, bestetik, ekintzailetza eraldaketarako palanka dela sinesten duen hiri bat bultzatzen jarraitzeko motor gisa. Kultura ekintzailean inbertitzen duen hiria, alegia, talentua erakartzen eta fidelizatzen duena, proiektu berritzaileen azelerazioan eta hazkundean laguntzen duena, eta pertsonen, enpresen eta ekosistemako eragileen arteko benetako konexioak sortzen dituena, ekonomian eta enpleguan eragina duten aukera berriak aktibatzeko.
Izan ere, Donostian, proiektu guztiek dute garrantzia.
Informazio gehiago: www.ekinn.fomentosansebastian.eus/eu/